У ЗША ўпершыню за 15 гадоў правялі смяротную кару шляхам расстрэлу

У пятніцу ў ЗША ўпершыню за 15 гадоў была праведзеная смяротная кара шляхам расстрэлу, піша BBC. 67-гадовы зняволены Брэд Сігман расстраляны трыма добраахвотнікамі з папраўчага дэпартамента штата Паўднёвая Караліна. Стрэлы рабіліся адначасова з вінтовак са спецыяльнымі кулямі.

Сігман быў асуджаны да смяротнага пакарання ў 2002 годзе за падвойнае забойства бацькоў сваёй былой дзяўчыны. Пасля затрымання ён прызнаўся, што збіраўся прычыніць шкоду і ёй, паколькі яна разарвала з ім адносіны.

Сведкамі пакарання былі тры члены сям'і забітых, а таксама духоўны настаўнік Сігмана. Па іх словах, зняволены быў прывязаны да крэсла, пад якім стаяла ёмістасць для збору крыві.

Перад расстрэлам Сігман заклікаў "братоў-хрысціян дапамагчы пакласці канец смяротным пакаранням". Пасля гэтага яму на галаву надзелі мяшок. У пакаранага была чырвоная мішэнь у форме яблычка, прыстаўленая да сэрца. Пасля стрэлу доктар правёў агляд і аб'явіў пра смерць.

Выкарыстаныя кулі распрацаваныя так, каб распадацца пры ўдары і наносіць максімальную шкоду, аднак медыцынскія эксперты спрачаюцца пра тое, наколькі моцны боль яны могуць прычыніць.

У Паўднёвай Караліне большасць зняволеных, асуджаных да смерці, караюць з дапамогай электрычнага крэсла, але тры апошнія пакаранні былі здзейсненыя з дапамогай ін'екцый, у склад якіх уваходзіў пентабарбітал.

Па словах адвакатаў, Сігману прапаноўвалі абраць спосаб пакарання — крэсла або ін'екцыю. Ён выбраў расстрэл.

Па данных Інфармацыйнага цэнтра па смяротных пакараннях, ніводны губернатар Паўднёвай Караліны не памілаваў зняволенага, асуджанага да вышэйшай меры з 1976 года. З гэтага часу ў ЗША толькі тры чалавекі былі пакараныя смерцю шляхам расстрэлу.

Смяротная кара ў ЗША з'яўляецца легальнай мерай пакарання ў 27 штатах. Аднак у 8 штатах на яе накладзеныя рознага кшталту мараторыі.