Расіяне атакавалі прыватны садок у Харкаве, адзін чалавек загінуў

22 кастрычніка пад расійскі ўдар патрапіў прыватны дзіцячы садок у Халаднагорскім раёне Харкава.

Як паведаміў гарадскі галава Харкава Ігар Церахаў, у выніку атакі ёсць параненыя дзеці. На месцы ўдару ўзнік пажар. Усіх дзяцей з садка эвакуявалі, перадае hromadske.ua.

Кіраўнік абласной адміністрацыі Алег Сінягубаў паведаміў, што атака была арганізаваная ўдарнымі беспілотнікамі. Паводле яго звестак, пацярпелі чатыры чалавекі, прынамсі двое з іх знаходзяцца ў цяжкім стане. Ён не ўдакладніў, колькі сярод іх дзяцей.

Пазней паведамілі, што інфармацыя аб параненых дзецях не пацвердзілася. Аднак падчас атакі адзін чалавек загінуў, а сямёра атрымалі раненні.

Уначы расійскія войскі атакавалі таксама Кіеўскую вобласць. У выніку ў сяле ў Браварскім раёне загінулі тры чалавекі. Гэта 38-гадовая жанчына і два дзіцяці — 6-месячнае немаўля і 12-гадовая дзяўчынка. Іх целы знайшлі на месцы пажару прыватнага дома.

Таксама некалькі чалавек атрымалі траўмы, у тым ліку — смяротныя.

Агулам у ноч на 22 кастрычніка пад расійскі ўдар трапілі Кіеў, Запарожжа, Адэская, Палтаўская і Днепрапятроўская вобласці. Атака вялася як ракетамі, так і ўдарнымі беспілотнікамі. Былі пашкоджаныя аб'екты грамадзянскай, а таксама энергетычнай, газавай і партовай інфраструктуры. У выніку атакі ў большасці рэгіёнаў увялі аварыйныя адключэнні святла.