У Польшчы затрыманы пенсіянер, які шпіёніў на карысць Беларусі

Спецслужбы Польшчы затрымалі грамадзяніна краіны, які падазраецца ў шпіянажы на карысць беларускага КДБ, паведамляе выданне Onet.

Затрыманы служыў спачатку ў польскім спецназе ZOMO, затым — у паліцыі і памежнай службе краіны. Мужчына скончыў сваю службу 20 гадоў таму на пасадзе лейтэнанта памежнай службы.

Падазраваны правядзе пад вартай тры месяцы, яму выстаўленае абвінавачванне ў шпіянажы па арт. 130 КК. Затрыманне праводзілі супрацоўнікі Агенцтва ўнутранай бяспекі (ABW).

Следства не выключае, што магчымыя іншыя арышты па гэтай справе, таму не дае дадатковай інфармацыі.