У Польшчы траіх беларусаў і дваіх украінцаў абвінавацілі ў шпіянажы
Супрацоўнікі ABW, ілюстрацыйнае фота
Супрацоўнікі Агенцтва ўнутранай бяспекі (ABW) і паліцыі Польшчы 25 і 26 лістапада 2025 года затрымалі пяцярых чалавек — траіх беларусаў і дваіх украінцаў. Усім ім выставілі абвінавачанне ў шпіянажы на карысць замежнай разведкі, паведамляе пракуратура Польшчы.
Называюцца імёны затрыманых беларусаў — Вікторыя М., Антон М. і Уладзімір У. Украінцы — Аляксандр С. і непаўналетняя Сафія Х.
Як сцвярджае следства, усе яны працавалі на замежную разведку супраць Польшчы з сакавіка 2024 года па люты 2025-га ў Жэшуве, Варшаве, Лодзі ды іншых населеных пунктах.
"Дзеянні падазраваных заключаліся ва ўсталяванні кантакту з прадстаўнікамі замежнай разведкі праз мэсэнджар Telegram і выкананні даручаных заданняў, уключаючы стварэнне і перадачу фатаграфічнай дакументацыі аб'ектаў крытычнай інфраструктуры і месцаў, якія маюць ключавое значэнне для бяспекі дзяржавы, а таксама ў расклейванні плакатаў і нанясенні графіці", — заяўляюць у пракуратуры. За выкананыя заданні яны атрымлівалі грошы ў крыптавалюце.
Траім падазраваным (Вікторыі М., Аляксандру С. і Антону М.) акруговы суд у Любліне прызначыў часовы арышт на тры месяцы. Непаўналетнюю Сафію суд па хадайніцтве пракурора накіраваў у прытулак для непаўналетніх на тры месяцы. Уладзіміру У. з улікам дрэннага стану яго здароўя прызначылі забарону на выезд з краіны.
За шпіянаж на карысць замежнай разведкі ў Польшчы пагражае ад 5 да 30 гадоў.
