У Лоеўскім раёне атрад "народнага апалчэння" трэніраваў генерал

У Лоеўскім раёне Гомельскай вобласці ў пятніцу сабралі атрад "народнага апалчэння", сфармаваны ў раённым цэнтры. Фотарэпартаж апублікавала раённая газета. Малая колькасць удзельнікаў тлумачыцца тым, што на навучанне прыйшлі толькі "камандзіры, іх намеснікі і добраахвотнікі". Колькі ўсяго "байцоў" у атрадзе, невядома. Напрыклад, у Мядзельскім раёне створаны дзясятак атрадаў "народнага апалчэння", але ў іх нават на паперы налічваецца агулам толькі каля 150 чалавек.

"Я добраахвотна запісаўся ў атрад народнага апалчэння, — рапартуе камандзір атрада Павел Гаўрушаў у шапцы з вялікім чырвона-зялёным сцягам. — Арганізаваныя заняткі для мяне і маіх калегаў былі карыснымі".

Інструктары правялі з мужчынамі заняткі па агнявой, ваенна-медыцынскай і тактычнай падрыхтоўцы. Яны патрымалі ў руках аўтаматы.

Пазней прэс-служба ўнутраных войскаў паведаміла, што трэніравалі "апалчэнцаў" байцы атрада спецпрызначэння "Буран" пад кіраўніцтвам генерал-маёра Аляксандра Быкава (намесніка камандуючага ўнутранымі войскамі і начальніка штабу).

Атрады "народнага апалчэння" ў РБ пачалі ствараць у 2022 годзе з лаяльных рэжыму Лукашэнкі людзей (нярэдка былых міліцыянтаў, вайскоўцаў, чыноўнікаў, паляўнічых), якім у сваіх населеных пунктах трэба будзе дапамагаць міліцыі ў змаганні з "дыверсантамі" і "незаконнымі ўзброенымі фармаваннямі", у ахове розных аб'ектаў. Некаторыя з удзельнікаў думалі, што іх рыхтуюць да вайны з NATO. Сёлета "народнае апалчэнне" падключалі да аховы выбарчых участкаў.