У "Беларускага Дома ў Варшаве" могуць адабраць будынак

Будынак “Беларускага Дома” ў Варшаве могуць адабраць. Пра гэта ў сацсетках паведаміў журналіст Ігар Кулей.

"І справа нават не ў тым, што паўсюдна скарачаецца фінансаванне і закрываюцца чарговыя ініцыятывы. А ў тым, што беларусы ў эміграцыі не навучыліся аптымальна распараджацца рэсурсамі, якія ў нас ёсць", — піша Кулей.

Журналіст нагадвае, што будынак перадалі беларусам чатыры гады таму. За гэты час будынак даваеннага часу так і не быў адрамантаваны.

"Ці можна было чатыры гады не губляць час і інвеставаць у сваё, і падтрымліваць сваё? Думаю, што можна. Але гэта ўжо наступны лэвэл арганізаванасці — талакой пабудаваць адну сінагогу на ўсіх. Дзеля гэтага трэба адчуваць сябе сапраўднай супольнасцю і зазірнуць за гарызонт падзеяў. Адказаць сабе на пытанне: што я асабіста атрымаю заўтра, калі сёння дапамагу суседу, замест таго, каб выкалаць яму вочы? А я ведаю прозвішчы і такіх беларусаў, што хадзілі і прасілі польскі бок забраць гэты будынак", — разважае Кулей.

Ён заклікае арганізатараў сустрэч, канферэнцый ды івэнтаў звярнуць увагу на гэты будынак.