У Беларусі могуць падняць пенсійны ўзрост для жанчын — зліў дакументаў

Улады задумаліся аб павышэнні пенсійнага ўзросту для жанчын да 63 гадоў (цяпер яны выходзяць на пенсію ў 58 гадоў) і скарачэнні тэрміну выплаты дапамогі па доглядзе за дзіцяці з 3 да 2 гадоў, вынікае з дакументаў, якія перадалі рэдакцыі Еўрарадыё Кіберпартызаны.

Мы вывучылі іх і расказваем, якія рэформы плануе ўкараняць рэжым Лукашэнкі ў найбліжэйшыя гады.

Павысіць пенсійны ўзрост для жанчын

З 2017-га па 2022-ы ў Беларусі паступова павышаўся пенсійны ўзрост: да 58 гадоў для жанчын і да 63 гадоў для мужчын.

У 2020 годзе Міністэрства працы і сацыяльнай абароны вырашыла працягнуць падобную практыку і прапанавала тагачаснаму прэм'ер-міністру Беларусі Сяргею Румасу павялічыць пенсійны ўзрост для жанчын, каб зраўняць яго з мужчынскім.

Вось чым гэта аргументуецца: па-першае, розніца ў працягласці жыцця ў мужчын і жанчын у Беларусі — 10 гадоў. Па-другое, з 2 млн пенсіянераў (якія дасягнулі пенсійнага ўзросту) 73,6% — жанчыны (1,5 млн) і 26,4% мужчыны (530 тыс.).

"Такім чынам, лічым абгрунтаваным павышэнне пенсійнага ўзросту толькі для жанчын — да 63 гадоў (да пенсійнага ўзросту, устаноўленага для мужчын, са штогадовым крокам у 6 месяцаў)", — пішуць чыноўнікі. 

Акрамя гэтага, чыноўнікі Мінпрацы лічаць, што павышэнне пенсійнага ўзросту для жанчын дазволіць вырашыць пытанне збалансаванасці бюджэту ФСАН без зніжэння ўзроўню пенсій.

"У мэтах змякчэння ўспрымання гэтай меры" ўлады прапануюць некалькі рашэнняў.

Напрыклад, захаваць жанчынам магчымасць выхаду на пенсію ў дзеючым пенсійным узросце (58 гадоў), але са змяншэннем пенсіі.