Трамп запатрабаваў ад ХАМАС неадкладна вызваліць усіх закладнікаў
Сектар Газа / Reuters
Прэзідэнт ЗША Дональд Трамп запатрабаваў ад ХАМАС неадкладна вызваліць усіх закладнікаў, якія ўтрымліваюцца тэрарыстамі ў сектары Газа, і вярнуць целы забітых.
"Ніводны член ХАМАС не будзе ў бяспецы, пакуль вы не зробіце тое, што я кажу, — напісаў Трамп у сацсетцы Truth Social. — Гэта ваша апошняе папярэджанне!".
Кіраўніцтву ХАМАС ён параіў пакінуць Газу, "пакуль яшчэ ёсць шанец". Жыхарам сектара Газа прэзідэнт ЗША абяцае "выдатную будучыню", але толькі ў выпадку, калі закладнікі будуць вызваленыя.
Раней Белы дом пацвердзіў, што ЗША вядуць перамовы з ХАМАС наконт вызвалення закладнікаў. Перад іх пачаткам былі праведзены кансультацыі з Ізраілем.
Закладнікі былі захоплены тэрарыстамі 7 кастрычніка 2023 года падчас нападу ХАМАС на Ізраіль. Частку з іх удалося вызваліць у выніку некалькіх абменаў.
