Супраць Паліны Шарэнда-Панасюк пачалі новыя крымінальныя справы
Паліна Шарэнда-Панасюк / facebook.com/Andrei.Sharenda
Учора стала вядома пра чарговае крымінальнае пераследаванне актывісткі і былой палітзняволенай Паліны Шарэнда-Панасюк.
Як паведаміў яе муж, Андрэй Шарэнда, супраць яе ўзбудзілі дзве новыя справы — па артыкулах 422 (наўмыснае ухіленне ад прэвентыўнага нагляду) і 361 КК (заклікі да дзеянняў, накіраваных на шкоду нацыянальнай бяспецы Беларусі). Таксама адбыліся допыты родных Паліны.
У той жа дзень Facebook заблакаваў акаўнт Паліны — ужо другі раз за апошні час. Паводле Андрэя, акаўнт не праіснаваў і трох дзён, а спробы абскардзіць блакіроўку не далі выніку.
“Зразумела, што лукашысты проста закідваюць акаўнты Паліны скаргамі, і алгарытмы Facebook спрацоўваюць”, — напісаў Андрэй Шарэнда, заклікаўшы ўсіх, хто ведае, як супрацьстаяць гэтаму, напісаць яму ў асабістыя паведамленні ці ў каментары.
