Што вядома пра беларусаў-дэзерціраў з расійскага войска
Расійская армія / прэс-служба Мінабароны Беларусі
Трое ўраджэнцаў Беларусі апынуліся ў спісе з 1292 вайскоўцаў, якія дэзерціравалі з 144-й асобнай мотастралковай брыгады Узброеных сіл РФ. Такія звесткі 30 кастрычніка апублікаваў украінскі праект "Хачу жыць".
"У нас няма інфармацыі пра іх лёс, толькі ведаем, што людзі ў гэтым спісе падаваліся ў вышук іх камандзірамі, як тыя, хто здзейснілі СПЧ [самавольнае пакіданне часткі — Еўрарадыё]", — расказалі "Хачу жыць" Еўрарадыё.
У спісе лічацца:
Шэўчык Віталь Віктаравіч, 15 траўня 1989 года, з вёскі Гаранавічы [імаверна, Баранавічы. — Еўрарадыё] Брэсцкай вобласці.
Юсін Віталь Аляксандравіч, 13 снежня 1970 года, месца нараджэння Брэст.
Усцінаў Сяргей Віктаравіч, нарадзіўся 18 красавіка 1977 года ў г. Выхаве [імаверна, Быхаў. — Еўрарадыё] Магілёўскай вобласці.
Пяць разоў судзімы — заключыў кантракт
З дапамогай BELPOL Еўрарадыё ўдалося ўстанавіць, што ў беларускай базе пашпартоў знаходзіцца толькі адзін з іх — Віталь Шэўчык. Астатнія, імаверна, маюць расійскія пашпарты.
Беларус быў пяць разоў судзімы, першы тэрмін атрымаў у 15 гадоў. Сярод злачынстваў: крадзяжы, хуліганства і разбой (за яго атрымаў 7 гадоў). Быў у базе вышуку 12 разоў.
Апошняе месца працы — "Баранавічыгазбуд" у 2018 годзе. Пасля гэтага ён пераехаў у Расію.
Мяркуючы па профілі Шэўчыка ў сацыяльных сетках, у яго двое дзяцей, а партнёрка жыве ў Курску.
Карэспандэнтка не прадстаўлялася супрацоўніцай Еўрарадыё, але прадставілася журналісткай і паразмаўляла з блізкімі сваякамі Віталя.
Бацька даўно з ім не меў зносінаў. Калі журналістка сказала, што спрабуе знайсці Віталя, той адказаў, што "міліцыя ведае, дзе ён знаходзіцца", і дадаў, што "Расія яго не адпускае".
Пасля гэтага трубку нечакана бярэ маці Віталя.
— У СМІ пісалі, што ён вырашыў не ваяваць. І я хацела даведацца, можа, вы ведаеце абставіны, як даўно ён у войску?
— Так, я ведаю, але хто ты такая і наогул, прабач, што на "ты" і наогул, чаму я павінна камусьці нешта распавядаць? Мне пофіг, журналістка ты, нават хоць сам прэзідэнт патэлефануе, я нічога нікому не раскажу.
