Але на гэты аргумент часта адказвалі, маўляў, дык а якая розніца? Беларускія каманды не ўдзельнічалі ў еўракубках шмат гадоў, яны не могуць прабіцца ў асноўную сетку еўрапейскіх турніраў. І тут "Дынама" змагло гэта зрабіць.
— Гэта важны ход, і размовы пра тое, што з Расіяй трэба аб'ядноўвацца яшчэ і ў футболе, цяпер стануць цішэйшыя. Беларусь гуляе ў Еўракубку. Гэта статусна, — падкрэслівае Пісарэнка.
Заўзець за "Дынама" ці супраць "Дынама"?
А ў лістападзе гульні ў Лізе канферэнцый прывядуць мінскае "Дынама" ў Польшчу. Там клуб згуляе з варшаўскай "Легіяй". У Варшаве жыве вялікая беларуская дыяспара, якая ўжо скупляе білеты на матч. Мы спыталі ў Пісарэнкі, ці ідзе ён на гульню — і за каго будзе заўзець? Бо імідж у "Дынама" неадназначны, часам яго называюць "клубам сілавікоў".
— Для мяне гэта вельмі складанае пытанне, і я шмат думаў на гэтую тэму, — прызнаецца Пісарэнка. — Заўзець за "Дынама"? Заўзець супраць? Як сябе паводзіць? У мяне да "Дынама" досыць абыякавае стаўленне. Я не магу сказаць, што мяне радуюць і натхняюць паразы каманды. Я не магу сказаць, што ў захапленні ад іх удалых дзеянняў. Хоць калі глядзеў адрэзкі матчаў у кваліфікацыі, думаў, што прыкольна — у беларускім футболе з'яўляюцца новыя імёны, пра якія нічога не было вядома.
Вось нядаўна з "Дынама" ў чэмпіянат Партугаліі з'ехаў Уладзіслаў Марозаў. Так, ён пакуль не асабліва актыўна там гуляе, але гэта ў любым выпадку класны пераход для маладога хлопца — пагуляць у Еўропе. Гэта шанец пра сябе заявіць. Атрымаецца ці не — іншае пытанне. Усё гэта — шанец для маладых беларускіх футбалістаў з'ехаць у Еўропу і вырасці ў больш перспектыўных гульцоў.
У мяне няма крайніх эмоцый што да "Дынама". Напэўна, я стаўлюся да каманды досыць нейтральна.
Білетаў на матч з "Легіяй" Пісарэнка не купляў і, хутчэй за ўсё, не будзе.
— Мне ўсё прапануюць купіць білеты на гульню з "Легіяй", але пакуль я не вельмі хачу туды ісці. Ісці дзеля класнага футбола? Ну, не, наўрад ці гэта будзе выбітны матч. Ісці паглядзець, як будуць здзекавацца з "Дынама" мясцовыя беларусы? Ну, напэўна, і гэта ўва мне не выклікае вялікіх эмоцый. Хутчэй за ўсё, я проста не пайду на гэты матч.
А дзе БАТЭ?
За апошнія некалькі гадоў ландшафт беларускага футбола моцна змяніўся. Калі каротка: раней усе гаварылі пра БАТЭ, сёння — пра "Дынама". Чаму?
— БАТЭ — гэта цяпер, на жаль, серадняк беларускага футбола. Калі я гляджу на вынікі матчаў, на гульнявыя нарэзкі, я бачу, што гэта ўжо не той БАТЭ, — кажа Пісарэнка. — Няма той каманды, таго моцнага еўракубкавага байца.
А некаторых футбалістаў БАТЭ ўжо няма ўнутры Беларусі. Напрыклад, Ігар Стасевіч ужо гуляе ў Кубку Казахстана.
У лістападзе 2020-га Ігар выставіў на дабрачынны аўкцыён футболку зборнай Беларусі са сваім аўтографам. Атрыманыя сродкі пайшлі ў Беларускі фонд спартыўнай салідарнасці (БФСС), пісала “Трыбуна”. Карацей, пакуль шлях у беларускі футбол для яго закрыты.
— Я думаю, што БАТЭ — усё, — кажа Пісарэнка. — Ён не тое што ў еўракубках, але і ў Беларусі ўжо не будзе на галоўных ролях, яму проста не дазволяць.
Гэта гісторыя, так. Але сёння гэта серадняк беларускага футбола. Ну, можа, крыху вышэй.
