СБУ заявіла пра паражэнне 41 самалёта стратэгічнай авіяцыі РФ

41 самалёт расійскай стратэгічнай авіяцыі ўдалося паразіць падчас аперацыі "Павуцінне". Пра гэта заявіў кіраўнік Службы бяспекі Украіны Васіль Малюк.

Ён адзначыў, што былі атакаваныя адразу чатыры вайсковыя аэрадромы — Белая, Дзягілева, Аленья і Іванава. Украінскія дроны паразілі такія самалёты, як А-50, Ту-95, Ту-22 М3 і Ту-160.

Малюк падзякаваў усім супрацоўнікам службы, прыцягнутым да гэтай спецаперацыі, і заявіў, што ўсе яе ўдзельнікі ўжо даўно знаходзяцца ва Украіне.

Спецаперацыя "Павуцінне" была праведзеная Службай бяспекі Украіны 1 чэрвеня. Украінскія дроны атакавалі расійскія вайсковыя аэрадромы — у тым ліку ў самай глыбі краіны, у Сібіры. Дзякуючы гэтаму ўдалося паразіць 34% стратэгічных носьбітаў крылатых ракет на аэрадромах базавання.

Як піша hromadske.ua, аперацыю рыхтавалі больш за паўтара года. СБУ спачатку пераправіла ў Расію FPV-дроны, потым — мабільныя драўляныя домікі, у якія пазней схавалі дроны. Іх фурамі даставілі да аэрадромаў і дыстанцыйна адкрылі, запусціўшы дроны.