Сарваў тры сцягі, адзін падпаліў — у Мінску затрымалі нецвярозага замежніка

Замежнага грамадзяніна будуць судзіць у Мінску за здзек над дзяржаўнай сімволікай. Яго затрымалі пасля званка ў міліцыю. Той, хто тэлефанаваў, паведаміў, што знайшоў на вуліцы сарваны беларускі сцяг і што яго, відаць, падпальвалі, расказваюць у МУС.

Падазраванага знайшлі з дапамогай сістэм відэаназірання. Высветлілі, што ўчора ўвечары ён адпачываў на вуліцы Зыбіцкай, "выпіваў ва ўстановах у цэнтры сталіцы, потым адправіўся гуляць па горадзе". Па дарозе сарваў на праспекце Незалежнасці тры дзяржаўныя сцягі, адзін з іх падпаліў. Яшчэ падпаліў сметніцу. Раней гэтага мужчыну ўжо судзілі за хуліганства і крадзеж. Гэтым разам крымінальную справу супраць яго завялі за здзек над дзяржаўнымі сімваламі. Следчыя таксама правяраюць, ці не датычны ён да здзяйснення аналагічных злачынстваў.