У Гродне не дазволілі пікет у падтрымку Алеся Бяляцкага
16 жніўня праваабаронцы Уладзімір Хільмановіч і Віктар Сазонаў атрымалі адказ з гарвыканкама.
“На падставе невыканання заяўнікамі пункта 4 артыкула 5 Закона РБ “Аб масавых мерапрыемствах” — так намеснік мэра Гродна Дзмітрый Куранцоў аргументаваў рашэнне ўладаў. Згаданы артыкул рэгламентуе форму і парадак падачы заяўкі на акцыю. Што менавіта было не так у заяўцы, чыноўнікі не тлумачаць.
Як сказаў Еўрарадыё Уладзімір Хільмановіч, праваабаронцы ўсё ж не адмовіліся ад свайго намеру інфармаваць грамадскасць пра пераслед Алеся Бяляцкага. Па яго словах, пакуль хоць адзін з праваабаронцаў будзе на свабодзе, яны будуць працягваць сваю справу ўсімі даступнымі спосабамі.
Нагадаем, што перад тым Баранавіцкі гарвыканкам адмовіўся даць дазвол на пікет у падтрымку Бяляцкага.
