Хостары і правайдары: Указ №60 не прынёс ні стратаў, ні развіцця

1 ліпеня 2010 года набыў моц адзін з самых гучных леташніх заканадаўчых актаў — Указ № 60 “Аб мерах па ўдасканаленні выкарыстання нацыянальнага сегменту сеткі Інтэрнэт”. Год таму людзі, якія займаліся бізнэсам у сусветным сеціве, чытаючы гэты дакумент, хапаліся за галаву. А ўказ называлі не інакш як спробай беларускіх уладаў усталяваць кантроль за інтэрнэтам.

Але звер аказаўся не такім страшным, як яго малявалі. Вось толькі да развіцця байнэта не прывёў, лічаць беларускія хостары і правайдары. І радуюцца, што хаця б грошай за апошні год праз Указ № 60 не страцілі.

“З эканамічнага пункту гледжання мы як правайдары ніякіх выдаткаў не панеслі, — распавялі Еўрарадыё ў адной з фірмаў, што займаюцца хостынгам і правайдынгам. — Але ў нас з’явілася шмат працы, сэнс якой мы не зусім зразумелі. А таксама шмат працы, сэнс якой відавочны, але незразумела, чаму выконваць яе мусім менавіта мы. У прыватнасці, рэгістрацыя рэсурсаў, якія месцяцца на нашых хостынгавых пляцоўках. Гэта і час займае, і сілы адбірае…”

Яшчэ больш бюракратычных працэдур Указ № 60 дадаў у будаўніцтва кампутарных сетак.

“Пачаў жа працаваць ААЦ [Аператыўна-аналітычны цэнтр пры прэзідэнце Беларусі. — Заўв. Еўрарадыё]. Адпаведна, з’явіліся бясконцыя ўзгадненні з імі па будаўніцтве сетак, па іх легалізацыі, па пракладанні оптыкі. Новыя паперкі з’явіліся ў адпаведнасці з Указам № 60. Патрабуецца ставіць на нейкія ўлікі, увесь час камунікаваць з райвыканкамамі. Дазволы… Гэта ўсё адміністрацыйныя працэдуры і час…”

Адсутнасць канструктыўнага эфекту ад Указа № 60 канстатуюць і ў адным з буйнейшых беларускіх правайдараў — Hoster.by.

“Аддзяліць тых, хто прыйшоў да нас на хостынг пасля Указа № 60, даволі складана. Апошнія 5 гадоў назіраецца стабільны рост кліенцкай базы ледзь не ў 1,5 разы за год. Вылучыць сярод іх тых, хто прыйшоў менавіта пад уплывам Указа № 60, немагчыма. Да таго ж, буйныя арганізацыі — як камерцыйныя, так і дзяржаўныя — па шэрагу прычынаў з большага і так хосціліся ў Беларусі. Найперш гэта было звязана са складанасцямі з аплатай замежнага хостынгу”.

Што праўда, і на Hoster.by кажуць пра тое, што фінансавых стратаў пасля Указа № 60 не панеслі, хаця і давялося цягнуць з-за мяжы серверы і ўсталёўваць нятанную дадатковую апаратуру:

“Для хостараў гэта, напэўна, усё ж было ў плюс. Нават нягледзячы на тое, што давялося пераносіць серверы з-за мяжы. Але сёння сітуацыя такая, што кожная юрыдычная асоба ці ІП проста абавязаная набываць хостынг у Беларусі. Натуральна, для хостараў гэта плюс”.

Адсутнасць эфекта ад гучнага Указа № 60 кіраўнік праекта Gemius Belarus Міхаіл Дарашэвіч тлумачыць менавіта вялікай колькасцю ўнармаванняў.

Міхаіл Дарашэвіч: “У суб’ектаў гаспадарання шмат сіл і сродкаў пайшло на адміністрацыйную работу. Напэўна, яна была не самая карысная, актыўная і бясплатная… То бок, ідэя Указа № 60 была нядрэнная: сапраўды, давайце разаўем “нацыянальны сегмент” інтэрнэта… Але рынак не стаў ні большы, ні лепшы. На ім не з’явілася новых гульцоў, а тыя, што былі, — не разбагацелі”.

Не тое каб беларускія хостары не спрабавалі скарыстаць указ для развіцця інтэрнэт-бізнэсу. Але плёну гэтыя спробы прынеслі мала. Дарэчы, знайшлі правайдары і спосаб абыходзіць самы хворы пункт Указа № 60 — абавязковую ідэнтыфікацыю карыстальнікаў інтэрнэта па пашпартах.

“Ва Указе № 60 фармулёўка вельмі няпэўная. Мы мусім забяспечыць ідэнтыфікацыю абанента. Але пашпартныя звесткі нідзе не згадваюцца. І мы здолелі даказаць ААЦ, што абанента ідэнтыфікуе нават яго лагін. Напрыклад, vasia37. Ідэнтыфікуе абанента? Так! І ўсё”.