Расійскія прапагандысты пішуць, што Украіна рыхтуе "маштабны наступ"

Расійскія прапагандысты баяцца паўтарэння Узброенымі сіламі Украіны Курскай аперацыі. Яны пішуць, што Украіна рыхтуе "маштабны наступ". Нібыта ўкраінскія падраздзяленні рыхтуюцца ўвайсці на тэрыторыю суседняй з Беларуссю Бранскай вобласці, а пакуль знаходзяцца ў 50 кіламетрах ад мяжы. Сцвярджаецца, што там сканцэнтравана больш за 5 тысяч вайскоўцаў і звыш 200 адзінак бронетэхнікі і танкаў (у тым ліку Leopard і Abrams). Некаторыя "маскіруюцца пад мірных жыхароў і займаюць жылыя дамы ля самай мяжы". А агулам плануецца задзейнічаць "да дзясятка брыгад". Расійская авіяцыя і артылерыя наносяць удары па гэтым раёне.

Па версіі расіян, мэтай акцыі "можа быць спроба перахапіць парадак перамоваў РФ і ЗША".

Украінскі бок пра актыўнасць у напрамку Браншчыны не паведамляў. Генштаб згадвае расійскія авіяўдары па шэрагу населеных пунктаў у Сумскай вобласці, якая мяжуе з Браншчынай.