Макрон заявіў, што Еўропа падтрымлівае Украіну
Эмануэль Макрон збіраў другую тэрміновую сустрэчу / x.com/EmmanuelMacron/
Прэзідэнт Францыі Эмануэль Макрон заявіў, што Еўропа падтрымлівае Украіну. Яна гатовая прыняць на сябе адказнасць за забеспячэнне міру і бяспекі на кантыненце. "Гэта фундаментальны інтарэс Францыі, і я з'яўляюся яго гарантам", — падкрэсліў Макрон.
У сераду прайшла другая тэрміновая сустрэча лідараў краін ЕС, Канады, Ісландыі і Нарвегіі (першая сустрэча прайшла ў панядзелак). Пасля яе і з'явілася згаданая заява. "Мы перакананыя ў неабходнасці павелічэння нашых выдаткаў і нарошчвання нашага патэнцыялу ў галіне абароны і бяспекі для Еўропы і кожнай з нашых краін", — напісаў французскі прэзідэнт у Х. Ён паабяцаў, што "рашэнні будуць прыняты ў бліжэйшыя дні і тыдні".
На сустрэчы было пацверджана, што Украіне патрэбны трывалы мір і годныя даверу гарантыі.
Тым часам Белы дом анансаваў візіт прэзідэнта Францыі Эмануэля Макрона і прэм'ер-міністра Вялікабрытаніі Кіра Стармера ў ЗША на наступным тыдні. Ён адбудзецца на фоне жорсткай крытыкі, якая абрынулася з боку амерыканскага прэзідэнта Дональда Трампа і яго адміністрацыі на прэзідэнта Украіны Уладзіміра Зяленскага. Напярэдадні Трамп назваў Зяленскага "дыктатарам". Таксама ён заявіў пра зрыў пагаднення з Украінай па рэдказямельных выкапнях.
Чакаецца, што Стармер прадставіць Трампу праект адпраўкі ва Украіну 30 тысяч вайскоўцаў з еўрапейскіх краін.
