Расія збіраецца "эвакуяваць" жыхароў Курскай вобласці праз Беларусь
На беларуска-ўкраінскай мяжы, студзень 2025-га / gpk.gov.by
Расія збіраецца "эвакуяваць" жыхароў Курскай вобласці праз Беларусь. Пра гэта паведаміла ўпаўнаважаная па справах чалавека ў РФ Таццяна Маскалькова. Паводле яе інфармацыі, гэтыя расіяне на сённяшні дзень знаходзяцца ва ўкраінскім горадзе Сумы.
"Ёсць дамоўленасць з Чырвоным Крыжам і з украінскім бокам, што яны будуць эвакуяваныя праз Беларусь у Расію", — цытуе словы Маскальковай ТАСС.
Украіна з лета 2024-га кантралюе частку тэрыторыі Курскай вобласці Расіі (у тым ліку і раённы цэнтр Суджа). На ёй дагэтуль знаходзяцца мірныя жыхары, якія трапляюць пад расійскія абстрэлы. Некаторыя з гэтых людзей раней добраахвотна пагадзіліся выехаць на тэрыторыю Украіны, дзе ў іх больш бяспечныя ўмовы.
Колькі расіян РФ збіраецца вярнуць праз РБ, пакуль не агучваецца (пазней стала вядома, што іх некалькі дзясяткаў). Беларусь выкарыстоўваецца і для абменаў ваеннапалоннымі.
