Пракуратура: міліцыя на паўгода "згубіла" забойцу дзвюх дзяўчат з Бабруйска

Падчас пракурорскай праверкі ўстаноўлена, што міліцыянты падыходзілі да кантролю за Аляксандрам А. фармальна: не выконвалі перыядычнасць прафілактычных мерапрыемстваў; не правяралі свае звесткі аб перыядычным пражыванні Аляксандра А. у знаёмай і не праводзілі ў сувязі з гэтым пошукавыя мерапрыемствы для высвятлення яго месцазнаходжання; не запаўнялі і не выстаўлялі інфармацыйна-пошукавую карту.

Такім чынам, з лютага па ліпень 2018 года мужчына, які раней учыніў злачынства, "аказаўся па-за полем зроку супрацоўнікаў крымінальна-выканаўчай інспекцыі УУС Бабруйскага гарвыканкама". Пракуратура лічыць, што гэтыя парушэнні, сярод іншага, прывялі да таго што А. 20 ліпеня 2018 года здзейсніў рэзананснае двайное забойства дзяўчат.

"Адсутнасць належнага прафілактычнага кантролю спрыяла здзяйсненню ім правапарушэнняў і асабліва цяжкага злачынства", — канстатавалі ў бабруйскай пракуратуры.