Палітвязню Ігару Лосіку перадаюць абрыўкі лістоў жонкі

Палітвязню Ігару Лосіку перадаюць абрыўкі лістоў жонкі Дар'і. Такую выснову яна зрабіла, чытаючы апошні яго ліст. "Са здзіўленнем [Ігар] пытаўся, чаму я пішу ліст на абрыўках паперы, і чаму ён складаецца толькі з некалькіх фразаў", — піша Дар'я Лосік у Facebook. Яна мяркуе, што гэта робіць цэнзар гомельскага СІЗА № 3, які пакідае "некалькі сказаў з тэксту". Раней палітвязень пра абрыўкі лістоў не пісаў.

"З усіх месцаў зняволення, дзе знаходзіўся мой муж, СІЗА-3 у Гомелі выбрала найбольш выдасканалены метад блакавання перапіскі", — піша Дар'я Лосік.

Адміністратар тэлеграм-канала, пазней прызнанага экстрэмісцкім у Беларусі, Ігар Лосік быў затрыманы 25 чэрвеня 2020 года і з таго часу знаходзіцца за кратамі. У зняволенні ён тройчы ладзіў галадоўкі. Закрыты суд у Гомелі пачаўся 24 чэрвеня сёлета. Яго і іншых палітвязняў абвінавачваюць  у арганізацыі "масавых беспарадкаў" у Беларусі падчас падрыхтоўкі і правядзення прэзідэнцкіх выбараў у 2020 годзе, у "распальванні сацыяльнай варожасці".