Не меней за 93 тыс літраў нелегальнага алкаголю завезлі ў Беларусь з Расіі

З пачатку гэтага года ў Беларусі канфіскавалі 98 тысяч літраў кантрафактнага алкаголю, прычым не меней за 95% з яго завезлі з Расіі, паведамляе прэс-служба МУС. То бок гэта не меней за 93 тысячы літраў.

У ведамстве адзначаюць, што абарот “шэрага” алкаголю выяўляюць звычайна міліцыянты падчас аператыўна-вышукавых і прафілактычных мерапрыемстваў. Апроч таго добрасумленныя грамадзяне самі рэгулярна паведамляюць пра асобаў, спрычынных да нелегальнага алкагольнага бізнэсу.

За мінулы год ад выпадковых атручэнняў алкаголем у Беларусі памерла 1497 чалавек — такія звесткі раней прыводзіў Белстат.