Наведнік мінскай крамы зарэзаў сваю спадарожніцу (вельмі жорсткае відэа)

Па гарачых слядах затрымалі міліцыянты 41-гадовага раней судзімага мінчука, які нанёс удар нажом жанчыне ў краме.

Паводле інфармацыі прэс-службы мінскай міліцыі, здарэнне адбылося ў краме спіртных напояў па вуліцы Громава. Туды зайшлі мужчына і жанчына, якія доўга выбіралі, што купіць. Па словах прадавачкі, мужчына быў заўважна п'яны, а ў яго спадарожніцы на твары былі відаць сляды пабояў.

Прадавачцы падалося, што жанчына не збіралася нічога набываць, а хацела ёй нешта сказаць. Магчыма, папрасіць дапамогі. Заўважыўшы гэта, мужчына знянацку ўдарыў жанчыну нажом у спіну і выйшаў з крамы. Яго спадарожніца засталася ляжаць на падлозе ў лужыне крыві.

Прадаўцы выклікалі міліцыю. Праваахоўнікі затрымалі мужчыну праз 10 хвілінаў. Пры затрыманні ён не супраціўляўся. Даведаўшыся, што жанчына атрымала сур'ёзную рану, прызнаўся ў зробленым і заявіў, што не хацеў цяжкіх наступстваў.

У лякарні ў пацярпелай дыягнаставалі закрытую чэрапна-мазгавую траўму лёгкай ступені, страсенне галаўнога мозгу, колата-рэзаную рану паяснічнай вобласці злева з пашкоджаннем міжрабрыннай артэрыі, скразным раненнем аорты, закрытую траўму жывата і разрыў правай долі печані. Медыкі некалькі дзён змагаліся за жыццё жанчыны, але выратаваць яе не змаглі.

Падчас расследавання выявілася, што жанчына і мужчына жылі разам. Мужчына раней неаднаразова прыцягваўся да адказнасці за наўмыснае прычыненне цяжкага цялеснага пашкоджання, а таксама за пагрозу забойствам, прычыненнем цяжкіх цялесных пашкоджанняў або знішчэннем маёмасці. Яго не толькі пазбаўлялі волі, але і ўжывалі прымусовае лячэнне ад алкагольнай залежнасці. На момант гэтага злачынства мужчына ўхіляўся ад выплаты аліментаў за сваё непаўнагадовае дзіця.

Цяпер на яго пачалі крымінальную справу. Расследаванне працягваецца. Прызначаны шэраг экспертыз.