Нацыянальны пашпарт Беларусі пасмяротна выдалі Ларысе Геніюш

31 снежня паэтцы Ларысе Геніюш пасмяротна выдалі Нацыянальны пашпарт Беларусі. Пра гэта паведамляецца на старонцы Беларускага пашпартнага цэнтру.

"Яна не дачакалася гэтага дня. Але гэты дзень дачакаўся яе", — гаворыцца на старонцы Беларускага пашпартнага цэнтру ў Фэйсбуку.

Ларыса Геніюш яшчэ да пачатку Другой сусветнай вайны выехала з Заходняй Беларусі ў Чэхаславакію. Была сакратаркай рады БНР і захавальніцай архіву. Пасля вайны Чэхія выдала Ларысу Геніюш і яе мужа Янку савецкім органам. Абаім прызначылі лагерныя тэрміны. Выйшаўшы на волю, сям'я Геніюшаў пасялілася ў Зэльве і да канца жыцця заставалася пад наглядам КДБ.

Ларыса Геніюш лічыла сябе грамадзянкай Беларускай Народнай Рэспублікі і адмовілася ад грамадзянства СССР.

"Мая Бабуля сваім жыццём даказала, як можна і як варта, а можа, нават, як трэба паступаць і Ёй, напэўна, належыцца пашпарт незалежнай Беларусі, якога не дачакалася", — пракаментаваў унук паэткі Міхаіл Геніюш.