На "Беларуськаліі" разарвала ёмістасць з-пад салянай кіслаты, ёсць пацярпелыя
Здарэнне на "Беларуськаліі" / МНС
Надзвычайнае здарэнне адбылося на прамысловай пляцоўцы 4-га рудаўпраўлення ААТ "Беларуськалій".
Як паведамляюць у прэс-службе МНС, на адкрытай пляцоўцы цэха мембраннага электролізу разарвалася пустая ёмістасць з-пад салянай кіслаты. Паводле папярэдняй інфармацыі, пацярпелі чатыры чалавекі.
Пры гэтым была пашкоджаная суседняя ёмістасць з салянай кіслатой.
На месцы здарэння працуюць восем адзінак тэхнікі МНС.
У прэс-службе Мінздароўя заявілі, што ўсе пацярпелыя з хімічнымі апёкамі і камбінаванымі траўмамі знаходзяцца ў салігорскай бальніцы.
Для аказання дапамогі на месца здарэння выехалі чатыры брыгады хуткай медыцынскай дапамогі. Таксама ў Салігорск накіравалі медыцынскую брыгаду ў складзе камбустыёлага, траўматолага і рэаніматолага для дапамогі пацярпелым падчас інцыдэнту.
