Лукашэнка вырашыў не адключаць інтэрнэт у Беларусі ў дзень "выбараў"

25 студзеня беларусы сутыкаліся з перабоямі падчас падключэння да VPN-сэрвісаў і асобных замежных сайтаў, у сувязі з чым многія асцерагаліся магчымага адключэння інтэрнэту і паўтору шатдаўну 2020-га. Аднак 26 студзеня, у асноўны дзень галасавання, улады, мяркуючы з усяго, вырашылі не "тузаць рубільнік".

Праблемы са стабільнай працай 25 студзеня закранулі як мінімум шэсць папулярных сэрвісаў ананімізацыі, уключаючы Proton VPN, NordVPN і TunnelBear. Аднак некаторыя VPN-сэрвісы, такія як Psiphon, працавалі без збояў.

Паводле звестак Еўрарадыё, ужо 25 студзеня колькасць падключэнняў да Psiphon павялічылася больш чым на 66% у параўнанні з папярэднім днём.

Збоі таксама закранулі папулярныя інтэрнэт-платформы, у тым ліку папулярныя сярод геймераў Steam і Discord. Хто ведае, магчыма, улады такім чынам вырашылі адарваць моладзь ад манітораў, каб павысіць яўку на выбарчых участках.

Аднак астатнія рэсурсы, у тым ліку Ютуб і Тэлеграм, працуюць без абмежаванняў.

Лукашэнка раней заяўляў, што інтэрнэт можа быць цалкам адключаны ў выпадку паўтарэння падзей 2020 года. Акрамя таго, ужо два Новыя гады запар улады часткова блакавалі Ютуб да паўночы, каб беларусы не бачылі звароту Святланы Ціханоўскай.

Дарэчы, блакаванне інтэрнэту ў 2020-м каштавала Беларусі $336,4 млн.