Сядзеў з блогерам з "Марафона адзінства" — мінчук, які выйшаў супраць "выбараў"

21-гадовы мінчук Міраслаў Кандрацьеў 26 студзеня выйшаў на акцыю пратэсту супраць "выбараў" Лукашэнкі. Хлопец прыйшоў на плошчу Якуба Коласа і ўзняў над галавой плакат "Лукашэнку ў Гаагу". Ён прастаяў каля дзесяці хвілін, а потым яго затрымалі.

Пасля "сутак" Міраслаў пакінуў Беларусь. У гутарцы з журналістамі "Зеркала" хлопец расказаў, як наважыўся на акцыю і што цяпер адбываецца на Акрэсціна.

Увесну мінулага года Кандрацьеў скончыў каледж і па размеркаванні стаў працаваць электраманцёрам на Мінскім механічным заводзе імя Вавілава. Палітыкай, кажа, да восені 2024-га асабліва не цікавіўся, пакуль яго на заводзе не прымусілі ўступіць у дзяржаўны прафсаюз.

"Сёння скажуць уступіць у прафсаюз, а заўтра — на выбарах за Лукашэнку галасаваць. Потым, можа быць, у войска прымусяць пайсці, на вайну адправіцца. Прыкладна такія пайшлі думкі", — расказвае малады чалавек.

Паслухаўшы калег, сярод якіх былі і прыхільнікі расійскай агрэсіі, Міраслаў вырашыў публічна выступіць супраць палітыкі Лукашэнкі. У дзень выбараў ён напісаў плакат, намаляваў бел-чырвона-белы сцяг і паехаў у цэнтр Мінска. Плакат ён узняў над галавой, калі стаяў каля помніка Якубу Коласу. "Бурнай рэакцыі і нейкай падтрымкі ў людзей я, на жаль, асабліва не бачыў", — дадае хлопец.

Хвілін праз 10 яго затрымалі, начапілі кайданкі на рукі і завялі ў падземны пераход. Адтуль даставілі ў Савецкі РУУС Мінска. Усю дарогу ён правёў на каленях, тварам у падлогу. Кажа, ужо каля РУУС "нешта надзелі на вочы" і так вялі ў кабінет.

У міліцыі ў тэлефоне хлопца знайшлі не толькі падпіскі на так званыя "экстрэмісцкія" тэлеграм-каналы, але і паведамленне пра затрыманне, якое Міраслаў адпраўляў праваабаронцам "Вясны", а потым сцёр. Дома ў хлопца адбыўся ператрус, падчас якога нічога не знайшлі.

Увечары Міраслава адвезлі ў ІЧУ на Акрэсціна, дзе ён прабыў адны суткі да суда. У трохмеснай камеры іх было дзесяць чалавек, святло там не выключалі.

Суд на наступны дзёнь прайшоў у анлайн-рэжыме. За несанкцыянаваны пікет хлопцу прысудзілі 15 сутак. "Характэрна, што на судзе я выразна сказаў, што не прызнаю віну, але ў пратаколе ў мяне напісана інакш", — расказвае ён.

Пасля суда Міраслава перавялі ў ЦІП на Акрэсціна. У чатырохмеснай камеры, згадвае ён, сядзець было даволі камфортна, хаця там у розны час было сем-дзесяць чалавек: "Пакой даволі вялікі, месца хапала. Стаяў стол, лаўкі. Былі часопісы, Кнігі, крыжаванкі, хлеб. Мужчыны расказвалі, што напярэдадні выбараў іх звадзілі ў душ, хоць даўно такога не было. Вось такі падарунак".

Потым яго перавялі ў камеру, дзе былі толькі палітычныя. У двухмесным памяшканні знаходзіліся 15 чалавек. Тут моцна грэлі батарэі, таму было вельмі горача. Хлопец кажа, што ўсе сустрэтыя ім палітычныя сядзелі за падпіскі. Быў чалавек, якога забралі за аватарку на Фэйсбуку, і мужчына, арыштаваны за гірлянду. У гірляндзе, па словах арыштаванага, былі не толькі белыя і чырвоныя шарыкі — там былі і іншыя колеры, у тым ліку спалучэнне чырвонага з зялёным. "Два гады яна ў яго вісела. У дзень выбараў да яго прыйшлі сябры, яны накрылі стол і яе ўключылі. А насупраць дома, дзе жыве гэты чалавек, — выканкам, там участак для галасавання. Хтосьці адтуль патэлефанаваў у міліцыю, прыйшлі супрацоўнікі, і гаспадара затрымалі", — расказвае Міраслаў.

Быў у камеры і блогер, якога забралі з праўладнага "Марафону адзінства". У ЦІП ён знаходзіўся ў майцы з лагатыпам мерапрыемства. Кажа, на гэтым "марафоне" да яго падышлі міліцыянты, папрасілі тэлефон на праверку і цэлую гадзіну ў ім капаліся. "Знайшлі нейкія артыкулы з "экстрэмісцкіх" сайтаў і адправілі на суткі. Ён быў у шоку, таму што праўладны, і яго ўзялі", — дзеліцца ўспамінамі хлопе.

Міраслаў кажа, што супрацоўнікі ЦІП прапаноўвалі затэлефанаваць родным, каб папрасіць заплаціць за знаходжанне на Акрэсціна. Прычым вязням забаранялі казаць пра самапачуванне: "У мяне моцна апухла нага. Відаць, блышчыцы пакусалі. Яны былі ва ўсіх маіх камерах. У чалавека, які сядзеў са мной, была падагра, і таксама апухла нага. Яны давалі парацэтамол ці нешта такога плану".

Міраслаў пакінуў краіну на наступны ж дзень пасля вызвалення.