Кіраўнік вайсковай хунты М'янмы дамаўляўся ў Мінску пра зброю — СМІ

Кіраўнік вайсковай хунты М'янмы Мін Аўн Хлайн падчас сустрэчы з Лукашэнкам абмяркоўваў пастаўкі зброі з Беларусі. Пра гэта паведаміла выданне Mizzima News Media, якое асвятляе падзеі ў М'янме з-за мяжы, заўважыла Радыё Свабода. Mizzima News Media было заснаванае ў Індыі вэтэранамі дэмакратычнага паўстання ў М’янме ў 1988 годзе. Паводле звестак выдання, падчас візіту кіраўнік М'янмы сустракаўся з афіцыйнымі асобамі і прыняў удзел у бізнес-форуме ў мінскім "Прэзідэнт-гатэлі".

"Падчас візіту Мін Аўн Хлайн абмеркаваў пытанні эканамічнага і гандлёвага супрацоўніцтва і бяспекі, уключаючы пастаўкі зброі", — пішуць аўтары выдання. Яны згадалі, што ў справаздачы прадэмакратычнага руху Justice for Myanmar за 2022 год Беларусь была пазначаная як адна з краін, якая пастаўляе зброю рэжыму М’янмы.

Таксама ў выданні адзначылі, што ў 2021 годзе афіцыйны Мінск галасаваў супраць рэзалюцыі ААН, у якой асуджалі вайсковы пераварот. А ў верасні 2023-га М’янма акрэдытавала ў Беларусі свайго вайсковага аташэ.

Кіраўнік вайсковай хутны М'янмы наведаў Беларусь 7 сакавіка адразу пасля перамоў у Маскве з Уладзімірам Пуціным.

Мін Аўн Хлайн кіруе М'янмай ад жніўня 2021 года, калі ў краіне адбыўся вайсковы пераварот. Да таго часу ён камандаваў Узброенымі сіламі краіны. Міжнародны крымінальны суд выдаў ордар на яго арышт.