Гомельскія бацькі, якія пакінулі дачку паміраць ад голаду, атрымалі 19 гадоў

У Гомельскім абласным судзе сёння вынеслі прысуд па крымінальнай справе аб забойстве бацькамі заведама малалетняй дачкі, а таксама ў пакіданні ў небяспецы нованароджанага сына. 32-гадовая маці дваіх дзяцей і іх 35-гадовы бацька атрымалі па 19 гадоў зняволення. Маці будзе адбываць пакаранне ў папраўчай калоніі агульнага рэжыму, а бацька — у калоніі ўзмоцненага рэжыму, інфармуе БЕЛТА.

Прысуд не набыў законную моц і можа быць абскарджаны.

Следства па гэтай справе доўжылася каля двух месяцаў. Грамадзянскія сужэнцы пакінулі сваю трохмесячную дачку адну ў замкнёнай кватэры і дзесяць месяцаў не цікавіліся яе лёсам. Яны вялі бадзяжны лад жыцця і хаваліся пад выдуманымі імёнамі. За гэты час у іх нарадзіўся сын, якога бацькі пакінулі ў пад’ездзе жылога дома. Дзіця жывым знайшлі жыхары дома і паведамілі пра здарэнне ў міліцыю. Пасля гэтага міліцыя знайшла маці хлопчыка. Таксама ў кватэры бацькі дзіця знайшлі муміфікаваны труп трохмесячнай дачкі.

Фота: TUT.by