ЕС увёў забарону на транзіт расійскага звадкаванага газу

Сталі вядомыя абмежаванні, якія Еўрасаюз увёў супраць Расіі ў рамках 14-га пакета санкцый. Санкцыі, у прыватнасці, закранулі расійскі звадкавані прыродны газ (ЗПГ): уводзіцца забарона на яго транзіт праз еўрапейскія парты. Пры гэтым ЕС працягне закупляць газ у Расіі, але яго рээкспарт будзе забаронены. Забароненыя таксама інвестыцыі ў любыя новыя расійскія праекты, звязаныя з ЗПГ. Пад санкцыі трапілі таксама 27 танкераў, якія перавозяць расійскую нафту і нафтапрадукты.

Еўрасаюз таксама забараніў сваім кампаніям выкарыстоўваць сістэму перадачы фінансавых паведамленняў Банка Расіі і рабіць транзакцыі з кампаніямі, якія выкарыстоўваюць гэтую сістэму. Авіякампаніям краін ЕС з гэтага часу забаронена выконваць чартары і прыватныя пералёты ва ўсім свеце на замову фізічных і юрыдычных асобаў з Расіі. СМІ, палітычныя партыі і няўрадавыя арганізацыі Еўрасаюза больш не маюць права прымаць фінансы з расійскіх крыніцаў.

За абыход санкцый, уведзеных супраць Расіі, пад абмежаванні трапілі таксама кампаніі з Кітая, Казахстана, Кіргізіі, Турцыі і ААЭ.

Нагадаем, новыя абмежавальныя меры прадстаўнікі краін ЕС абмяркоўвалі больш за месяц. Узгадненне пакета блакавала Германія. Спрэчны пункт пра тое, што даччыныя кампаніі павінны будуць "кантрактна забараніць рээкспарт у Расію і рээкспарт для выкарыстання ў Расіі", то-бок гарантаваць, што іх тавар не апынецца ў РФ, у выніку выключылі. Раней такое палажэнне распаўсюджвалася толькі на агнястрэльную зброю, баявы рыштунак і тавары падвойнага прызначэння. Германія ж была занепакоеная, што яе малы бізнес пацярпіць, калі палажэнне будзе пашыранае за кошт цывільнай прадукцыі, хімікатаў або абсталявання для металаапрацоўкі. Санкцыі супраць Расіі ЕС уводзіць за яе агрэсію ва Украіне.