Экіпаж самалёта AZAL не папярэдзілі, што СПА ў Грозным адбівае атаку дронаў

Экіпаж самалёта Azerbaijan Airlines, які ляцеў з Баку, дыспетчары ў Грозным не папярэдзілі пра пагрозу беспілотнікаў і дазволілі пасадку. Пра гэта стала вядома з апублікаваных перамоваў пілотаў з дыспетчарамі, піша The Insider.

Самалёт Embraer 190 разбіўся 25 снежня 2024 года пры пасадцы каля казахстанскага горада Актау. Пры гэтым загінулі 38 чалавек: з ліку пасажыраў — сямёра расіян, 23 грамадзян Азербайджана і шасцёра грамадзян Казахстана. Таксама загінулі два пілоты. Агулам на борце было 67 чалавек, у тым ліку пяцёра чальцоў экіпажа.

У СМІ з'явілася інфармацыя, што прычынай авіякатастрофы стаў абстрэл самалёта расійскай СПА. У той дзень Грозны зазнаў атаку дронаў, і СПА вяла па іх агонь.

Кіраўнік Расавіяцыі Дзмітрый Ядраў прызнаваў атаку дронаў і казаў, што ў выніку яе быў уведзены рэжым "Дыван". Гэта азначае неадкладнае выдаленне паветраных судоў з названай прасторы.

Перамовы экіпажа з авіядыспетчарамі пацвярджаюць, што ў Чачні не палічылі неабходным закрыць паветраную прастору над Грозным перад тым, як сродкі СПА пачалі працу. У расшыфроўцы бачна, што экіпаж выконвае ўказанні дыспетчараў, спрабуючы зайсці на пасадку. У нейкі момант пілот паведамляе, што па кабіне самалёта прыйшоўся "ўдар птушак", а таксама, магчыма, адбыўся выбух паветранага балона. (Гэтыя версіі з'явіліся ў СМІ ў дзень авіякатастрофы, і іх спачатку падтрымалі ў Расавіяцыі.)

Дыспетчары прапанавалі экіпажу зрабіць пасадку ў Грозным, Махачкале ці іншым расійскім аэрапорце. Аднак тыя вырашылі ляцець назад у Баку. У выніку самалёт разбіўся ў Казахстане.

6 студзеня 2025 года прэзідэнт Азербайджана Ільхам Аліеў абвінаваціў улады РФ у катастрофе і запатрабаваў пакарання вінаватых у ёй. Расія дагэтуль не прызнае сваёй віны ў трагедыі.