Думаю, будзе яшчэ адна група памілаваных — Святлана Мацкевіч
Святлана Мацкевіч / Еўрарадыё
Улады не агучваюць імёны 16 вязняў, пра чыё вызваленне стала вядома сёння. Аднак паведамляецца, што трое з іх — старэйшыя за 50 гадоў, у дваіх ёсць хранічныя захворванні, адзін з'яўляецца інвалідам.
Еўрарадыё пацікавілася, ці ёсць сярод 16 вызваленых вязняў філосаф Уладзімір Мацкевіч, чыё імя знаходзіцца ў гуманітарным спісе.
"Пакуль такой інфармацыі ў мяне няма, як і інфармацыі пра іншых памілаваных, — адказвае адна з ініцыятарак Аб’яднання сваякоў палітвязняў Святлана Мацкевіч. — Я так разумею, што гуманітарны спіс сёння не працоўны інструмент для Лукашэнкі. Ён ёсць на стале, але Мінск вызваляе беларусаў па нейкіх сваіх перакананнях.
16 памілаваных — гэта вельмі мала. Мы прагназавалі, што іх будзе больш і я думаю, што будзе яшчэ адна група.
Звычайна ў такіх групах ёсць людзі, асуджаныя як за палітыку, так і за нешта іншае. Сярод палітычных звычайна адзін-два вядомых людзей. Гэтага мала. Але хай хоць так — толькі б павыпускалі".
