Чыноўнік абурыўся, што камунальнікі не звяртаюцца ў міліцыю для пошуку вандалаў
Міліцыянт сочыць за сітуацыяй у Мінску па відэакамерах / minsknews.by
Намеснік старшыні Мінгарвыканкама Алег Корзун падчас сустрэчы "з працоўнымі калектывамі прадпрыемстваў сферы ЖКГ Першамайскага раёна" абурыўся, што камунальнікі не звяртаюцца ў міліцыю для пошуку вандалаў, якія ламаюць лаўкі ці размалёўваюць сцены дамоў. "У горадзе дастаткова відэакамер, каб знайсці хуліганаў, а дзеючае рашэнне Мінгарсавета дазваляе спаганяць з іх пакрыццё шкоды ў 100-разовым памеры", — цытуе яго словы minsknews.by.
Прыклады пакаранняў хуліганаў Корзун прапануе змяшчаць у СМІ для "прафілактычнай працы". Толькі прадстаўніца аднаго ЖЭУ сказала, што вандалаў знайшлі і з іх спаганяюць нанесеную шкоду.
Намеснік старшыні Мінгарвыканкама ўзняў і яшчэ адну праблему — "выпадкі некарэктнага закрыцця заявак, якія паступаюць у службу "115". Высветлілася, што большасць прэтэнзій да камунальнікаў была звязана з тым, што выканаўцы работ па заяўках "дасылаюць у пацверджанне сваіх дзеянняў фота іншых аб'ектаў". Кіраўнікі ЖЭУ запэўнілі, што насамрэч працы па заяўках "выкананы ў поўным аб'ёме", а прыведзеныя прыклады — "тэхнічная памылка выканаўцаў".
