Беларускіх турыстаў, якія згубіліся на Эльбрусе, эвакуявалі

Беларускіх турыстаў, якія згубіліся на гары Эльбрус, сёння раніцай эвакуявалі. Пра гэта паведамляе МНС Беларусі. Верталёт з расійскімі ратавальнікамі вылецеў па турыстаў у 7 гадзін раніцы. Двума рэйсамі іх спусцілі на вышыню 2600 м, а адтуль на аўтамабілях перавезлі спачатку ў найбліжэйшую вёску, а затым у горад Лермантаў Стаўрапольскага краю Расіі.

У беларускім МНС нагадалі, што пошукавыя работы доўжыліся 36 гадзін. Яны ішлі ў складаных умовах надвор'я. Былі моцны шквалісты вецер і снег. Турыстаў знайшлі на вышыні 3800 метраў пад вяршыняй гары Уцюг.