Беларуская плыўчыха больш за год чакае грошы за медаль чэмпіянату свету

Больш за год чакае прэміяльных выплат беларуская плыўчыха Васіліна Хандошка.

На пачатку лютага 2024 года яна выступала ў нейтральным статусе на чэмпіянаце свету па водных відах спорту ў Катары. Беларуска ў сінхронным плаванні сола заваявала бронзу, набраўшы 245,10 бала.

Міжнародная федэрацыя па водных відах спорту (World Aquatics) дагэтуль не перадала ёй прызавыя выплаты — дзесяць тысяч долараў. Перашкодай сталі міжнародныя санкцыі, уведзеныя пасля пачатку шырокамаштабнай расійскай агрэсіі супраць Украіны.

"Гэтыя прызавыя, на жаль, па пэўных прычынах мне яшчэ ніхто не адправіў, і я спадзяюся, што ўсё ж такі атрымаю іх", — прыводзіць sport5.by словы плыўчыхі.

Пры гэтым Хандошка дадала, што медаль для яе "даражэй за любыя грошы". Дзяўчына кажа, што пасля яе перамогі ў іх павялічылі заробкі: "Да мяне сталі інакш ставіцца, я стала больш публічнай і магу праз інтэрв'ю распавядаць пра сябе і сінхронным плаванні. Гэта таксама прыемна. Плюс пасля майго медаля наш від уключылі ў спіс прыярытэтных відаў спорту, нам павялічылі заробак".