Беларуска перад 1 верасня спрабуе зарабіць на шакаладках з цытатамі Лукашэнкі

Перад 1 верасня беларуска, падпісаная ў TikTok як Надзея Аўгуць, вырашыла зарабіць на прадукцыі, якую яна назвала "шакалад для мерапрыемстваў у школе".

Як заўважыла "Наша Ніва", звычайна жанчына вырабляе невялікія падаруначкі для гасцей на вяселлі — шакаладкі з партрэтамі маладзёнаў ці магніцікі з імі. А перад Днём ведаў яна рабіла адмысловыя абготкі для шакаладак. З аднаго боку на абгортцы — мапа Беларусі ў колерах афіцыйнага сцяга і цытата Лукашэнкі "Патрыёта можа выхаваць толькі патрыёт". З другога — пазначаная школа, для якой, хутчэй за ўсё, прадукцыя была зробленая — Сеніцкая школа імя Янкі Купалы.

Вялікая частка каментатараў адмоўна ўспрыняла ідэю. Некаторыя абураліся, што для школы, якая носіць імя Янкі Купалы, не знайшлі верш паэта. Незадаволеныя былі людзі і тым, што пра патрыятызм беларусам кажуць па-руску.

Адзін з каментатараў змрочна пажартаваў: "У мяне пытанне: ці не будзе крымінальнай адказнасці, калі выкінуць абгортку ў сметніцу? Дзяржаўныя сімвалы, цытата галоўнакамандуючага, неяк боязна…"

Сёлета на адзіным уроку 1 верасня школьнікаў чакала праслухоўванне і цытат Лукашэнкі і напісанне ліста піянерам 2075 года.