Беларус на адпачынку ў Егіпце выпадкова ўключыў роўмінг, спісалі 237 рублёў

Беларус у сакавіку на адпачынку ў Егіпце выпадкова ўключыў роўмінг, у выніку ў яго спісалі 237 рублёў за 2,7 мегабайта. У кампаніі МТС яму пасля патлумачылі, што ўсё законна.

Мінчанін думаў, што роўмінг МТС у Егіпце ўвогуле не працуе. "Для параўнання, там сім-карта на 100 гігабайт каштуе 7 долараў, — расказвае ён "Сильным Новостям". — Мне пашанцавала, што я праз Wi-Fi гатэля паглядзеў баланс. Так бы былі ўвогуле касмічныя сумы".

"Ажыццяўленне перадачы даных магчыма як у выніку непасрэдных дзеянняў абанента, так і ў сувязі з асаблівасцямі наладжвання выкарыстанага абсталявання (напрыклад абнаўленне праграм), — патлумачылі ў кампаніі. — Спісанне сродкаў было абгрунтавана, прававых падстаў для пераліку або вяртання грашовых сродкаў не маецца".