Андрэй Кавалёў зацверджаны галоўным трэнерам хакейнага мінскага "Дынама" (фота)

Андрэй Кавалёў зацверджаны галоўным трэнерам хакейнага мінскага "Дынама". Пра гэта 21 снежня паведаміла прэс-служба хакейнага клуба. Кавалёву пра прызначэнне паведамілі і павіншавалі старшыня назіральнага савета ХК "Дынама-Мінск", міністр унутраных спраў Ігар Шуневіч і выканаўца абавязкаў гендырэктара клуба Павел Бурба (на здымках знізу).

Як інфармавала Еўрарадыё, у канцы лістапада ў інтэрв'ю праграме "Контуры" на тэлеканале АНТ старшыня Беларускай федэрацыі хакея Ігар Рачкоўскі заявіў, што галоўным трэнерам хакейнага мінскага "Дынама" мусіць быць паўночнаамерыканскі спецыяліст. Тады спіс з 15 кандыдатур быў скарочаны да 3. Можна меркаваць, што Кавалёва сярод іх не было. Былі чуткі, што ў ліку кандыдатаў быў галоўны трэнер нацыянальнай зборнай Беларусі Дэйв Льюіс.

Андрэю Кавалёву 49 гадоў. У мінулым ён вядомы беларускі хакеіст, пяць сезонаў (1984 — 1989 гг.) адгуляў за мінскае "Дынама". Трэнерскую кар'еру пачаў з 2009-га. З мінулага года працаваў у "Дынама" старэйшым трэнерам. Пасля таго, як у кастрычніку 2015 года з клубам развітаўся галоўны трэнер Любамір Покавіч, Андрэй Кавалёў пачаў выконваць яго абавязкі. Пад яго кіраўніцтвам дынамаўцы атрымалі 12 перамог у 22 матчах, займаюць у Заходняй канферэнцыі 8-е месца.