З'явіўся "Навігатар бяспечных перамяшчэнняў" для беларускіх уцекачоў
Праверка пашпарта на мяжы, ілюстрацыйнае фота / Еўрарадыё
Як пазбегнуць рызык пры перасячэнні межаў? Якія краіны могуць уяўляць пагрозу для беларусаў у вымушанай міграцыі? Якія міжнародныя механізмы ўплываюць на бяспеку перасоўванняў?
28 лютага каманда "Прававой ініцыятывы" прадставіла даследаванне, прысвечанае бяспецы паездак і знаходжанню беларусаў за мяжой. У ім аналізуюцца ключавыя фактары, якія ўплываюць на ўзровень рызыкі, у тым ліку міжнародныя пагадненні, вышуковыя базы і палітычныя адносіны краін з Беларуссю.
Акрамя таго, каманда прадставіла "Навігатар бяспечных перамяшчэнняў" — інтэрактыўную мапу, якая дапамагае ацэньваць узровень бяспекі знаходжання беларусаў у 193 краінах-сябрах ААН і 8 часткова прызнаных тэрыторыях.
"Калі мы кажам пра бяспечныя краіны, мы не маем на ўвазе тое, што беларусаў не могуць там затрымаць на сто адсоткаў, — звяртае ўвагу юрыстка і ініцыятарка праекта Крысціна Рыхтэр. — Іншае пытанне, ці будзе чалавек дакладна экстрадаваны пасля аналізу яго сітуацыі і правядзення неабходных працэдур у выпадку, калі ён знаходзіцца ў міжнародным вышуку".
Пазнаёміцца з поўным даследаваннем можна па спасылцы.
