Зяленскі параўнаў перамовы ЗША і РФ з колішнім ультыматумам Украіне

Уладзімір Зяленскі параўнаў перамовы ЗША і РФ у Саудаўскай Аравіі з колішнім ультыматумам Украіне, які аб'явіла Расія ў пачатку поўнамаштабнага ўварвання ў 2022-м. "Такое ўражанне, што цяпер адбываюцца нейкія перамовы з такім жа настроем. Але яны адбываюцца паміж прадстаўнікамі Расіі і ЗША. Зноў пра Украіну без Украіны, — цытуе словы ўкраінскага прэзідэнта hromadske.ua. — Калі мы ў самы складаны момант не пайшлі на ўсе гэтыя ўльтыматумы, адкуль такое адчуванне, што цяпер на гэта пойдзем?".

Зяленскі перанёс візіт у Саудаўскую Аравію, які планаваў на 19 лютага (аб'явіў пра гэта на прэс-канферэнцыі ў Анкары пасля сустрэчы з прэзідэнтам Турцыі Рэджэпам Таіпам Эрдаганам). Перамовы паміж ЗША і Расіяй прайшлі ў гэтай краіне 18 лютага. Дэлегацыі ўзначальвалі дзяржсакратар Злучаных Штатаў Марка Рубіа і кіраўнік МЗС РФ Сяргей Лаўроў. Яны дамовіліся "працаваць над нармалізацыяй дыпламатычных адносін" ЗША і Расіі, а таксама прызначыць каманды для пачатку працы над планам спынення вайны ва Украіне.