Зяленскі гатовы абмяняць пасаду прэзідэнта на гарантыі бяспекі для Украіны

Уладзімір Зяленскі гатовы абмяняць пасаду прэзідэнта на гарантыі бяспекі для Украіны. Пра гэта ўкраінскі прэзідэнт заявіў у нядзелю на прэс-канферэнцыі ў Кіеве.

"Калі вам трэба, каб я пакінуў пасаду, я гатовы. Магу памяняць гэта на NATO, калі ёсць такія ўмовы, — цытуе словы Зяленскага hromadske.ua. — Я факусуюся на бяспецы Украіны сёння, а не за 20 гадоў, і не збіраюся быць ва ўладзе дзесяцігоддзі. Таму гэта, напэўна, мой фокус і жаданая мара". Ён дадаў, што з'яўляецца законна абраным прэзідэнтам, а выбары будуць пасля заканчэння ваеннага становішча.

Прэзідэнт падкрэсліў, што Украіна не можа згаджацца на гарантыі бяспекі, якія будуць грунтавацца "на слове Расійскай федэрацыі". Паводле слоў Уладзіміра Зяленскага, сярод краін, якія павінны былі апынуцца за сталом мірных перамоў, павінны быць еўрапейскія дзяржавы (у тым ліку Францыя, Вялікабрытанія і Германія). Зяленскі згадаў і пра Турцыю, бо "яна важная ў кантэксце гарантый бяспекі".

Уладзімір Зяленскі паведаміў, што поўнамаштабная вайна каштавала Украіне $320 млрд. Ён падкрэсліў, што ЗША далі 100 млрд долараў, краіны ЕС разам з партнёрамі — таксама $100 млрд. А Украіна ўклала 120 млрд долараў сваіх сродкаў.

Украінскі прэзідэнт заявіў, што не прызнае дапамогу ад Злучаных Штатаў абавязкам, які трэба вяртаць. Ён меў пагадненне з папярэднім амерыканскім прэзідэнтам Джо Байдэнам, што гэтыя сродкі з'яўляюцца грантам, а не доўгам.

Зяленскі растлумачыў, што адмовіўся падпісваць з ЗША першы варыянт пагаднення аб рэдказямельных мінералах, таму што Вашынгтон хацеў атрымаць права на 50% запасаў карысных выкапняў ва Украіне. "Я не падпісваю тое, што будуць выплачваць дзесяць пакаленняў украінцаў", — заявіў украінскі прэзідэнт. І падкрэсліў, што галоўным пунктам пагаднення павінны стаць дакладныя гарантыі бяспекі для Украіны. Таксама ён хацеў бы пагаварыць з прэзідэнтам ЗША Дональдам Трампам аб міратворчым кантынгенце, які будзе знаходзіцца на ўкраінскай зямлі пасля спынення агню.