З крамы без сігналізацыі і відэакамер у Слуцку скралі сейф

У ноч на 24 лістапада невядомыя вынеслі сейф з крамы бытавых тавараў "Востраў чысціні" на вуліцы Тутарынава у Слуцку, піша kurjer.info. Выбітыя шыбы ў вокнах будынка пабачылі прадаўцы крамы, калі зранку прыйшлі на працу. Яны і выклікалі міліцыю.

Афіцыйная прадстаўніца ўпраўлення Следчага камітэта па Мінскай вобласці Таццяна Беланог кажа, што невядомы забраўся ў краму ўначы, высадзіўшы шыбу каменем. "Папярэдняя шкода склала больш за 1000 рублёў, але дакладная сума будзе вядомая падчас расследавання і пасля правядзення інвентарызацыі", — дадала яна.

Дарэчы, у краме не было ні сігналізацыі, ні камераў відэаназірання. На вокнах не было кратаў.

Следчыя пачалі крымінальную справу за крадзеж.