Японія можа ўвесці санкцыі супраць беларускага рэжыму на гэтым тыдні
Ужо на гэтым тыдні Японія можа ўвесці санкцыі супраць афіцыйнага Мінска, заявіў прэм'ер-міністр краіны Фуміа Кісіда. Гэта будзе адказ на ўдзел беларускага рэжыму ў вайне Расіі супраць Украіны.
"Што датычыць санкцый супраць Беларусі, то з улікам яе відавочнай датычнасці да ўварвання Расіі на Украіну, то я разлічваю, што санкцыі супраць некаторых асоб, пачынаючы з прэзідэнта Лукашэнкі, і арганізацый, меры па абмежаванні экспарту будуць прынятыя ўжо на гэтым тыдні", — цытуе 1prime.ru словы Кісіды.
Японія ўжо прыняла санкцыі супраць Расіі. Пад забарону трапілі экспартна-імпартныя аперацыі, размяшчэнне новага суверэннага доўгу Расіі і аперацый з ім у Японіі. Потым санкцыі былі пашыраныя на замарожванне капіталаў, забарону на выдачу віз прыватным асобам і арганізацыям, замарожванне актываў фінансавых арганізацый Расіі.
