УСУ пацвердзілі гібель вайскоўцаў падчас удару па палігоне на Днепрапятроўшчыне

Камандуючы Сухапутных войскаў УСУ Міхаіл Драпаты прызначыў праверку з удзелам вайсковай контрразведкі па факце трагедыі на вайсковым палігоне ў Днепрапятроўскай вобласці. Ён прызнаў, што падчас ракетнага ўдару 1 сакавіка на палігоне загінулі ўкраінскія вайскоўцы.

"Трагедыя на палігоне — гэта жудаснае наступства варожага ўдару. Вайна патрабуе хуткіх рашэнняў, адказнасці і новых стандартаў бяспекі, інакш мы губляем больш, чым маем", — гаворыцца ў звароце Драпатага, які з'явіўся ў сацсетках.

"Чакаў першыя звесткі, каб не быць галаслоўным, і цяпер павінен папярэдзіць: кожны, хто прымаў пастановы ў той дзень, і кожны, хто не прымаў іх своечасова, — усе панясуць адказнасць. Ніхто не схаваецца за тлумачэннямі або фармальнымі рапартамі", — заявіў камандуючы.

1 сакавіка Мінабароны Расіі заявіла пра ўдар ракетай "Іскандэр М" па вайсковым палігоне "Навамаскоўскі" ў Днепрапятроўскай вобласці. Паведамлялася, што там праходзілі ваенную падрыхтоўку вайскоўцы 157-й асобнай механізаванай брыгады УСУ.

Пазней пра гібель вайскоўцаў паведаміла народная дэпутатка Украіны Мар'яна Бязуглая. Яна заявіла, што "прылёт" адбыўся падчас шыхтавання вайскоўцаў, піша hromadske.ua.

Украінскі журналіст Юрый Бутусаў сцвярджае, што на палігоне ў пасёлку Чаркаскае дыслакуецца 168 батальён рэзерву. Паводле яго, пасля ўдару было каля 130 пацярпелых, прычым загінулі больш за 30 з іх. Журналіст кажа, што на палігоне працяглы час было шмат людзей, вялікая колькасць машын і брызентавых намётаў, але пры гэтым — "ніякай абароны".