Упершыню за два месяцы са Змітром Бандарэнкам сустрэўся яго адвакат
"3 сакавіка яна з ім сустрэлася на допыце. Сказала мне, што ён трымаўся бадзёра, хоць схуднеў", — паведаміла Вольга Бандарэнка.
Упершыню за два месяцы са Змітром Бандарэнкам, даверанай асобай кандыдата ў прэзідэнты на выбарах 2010 Андрэя Саннікава, сустрэлася яго адвакат Мар'яна Сямашка.
Як паведаміла БЕЛАПАН жонка Бандарэнкі Вольга, адвакат не бачыла свайго падабароннага з 29 снежня мінулага года.
З апошняга ліста Змітра Вольга даведалася, што ў мужа праблемы са здароўем. "У яго праблемы са страўнікам, са спінай. Але адвакату ён ні на што не скардзіўся, ён наогул з тых, хто не скардзіцца", — дадала Вольга.
Па словах жонкі палітыка, пасля прызнанняў Алеся Міхалевіча пра катаванні ў КДБ яна "чакала горшага".
Стала таксама вядома, што на 4 сакавіка прызначаны чарговы допыт Аляксандра Фядуты, які падчас выбарчай кампаніі быў даверанай асобай кандыдата ў прэзідэнты Уладзіміра Някляева.
Бандарэнку і Фядута вінавацяць у арганізацыі і ўдзеле ў масавых беспарадках у Мінску ўвечары 19 снежня. Ім пагражае да 15 гадоў пазбаўлення волі.
