У Сербіі прайшлі масавыя акцыі супраць карупцыі. Але Вучыч не ідзе на саступкі

У Сербіі прайшлі масавыя акцыі супраць карупцыі. На вуліцы, па розных ацэнках, выйшлі ад 88 000 да 325 000 чалавек. Але прэзідэнт краіны Аляксандр Вучыч не збіраецца ісці на саступкі.

Ён заяўляе, што гатовы да новых выбараў у бліжэйшыя 3-4 месяцы, калі апазіцыя гэтага запатрабуе. На яго думку, галасаванне толькі ўмацуе яго статус, бо прынясе яму пераканаўчую перамогу.

Пратэсты ў Сербіі пачаліся пасля таго, як 1 лістапада 2024 года ў горадзе Нові Сад абрынуўся навес над уваходам у толькі што адрамантаваны будынак вакзала. Там загінулі 15 чалавек. "Вашы рукі ў крыві", — такім быў першы лозунг пратэстоўцаў.

Першымі на вуліцы сталі выходзіць студэнты, а неўзабаве да іх далучыліся фермеры і супрацоўнікі сферы адукацыі, незадаволеныя эканамічнай сітуацыяй у Сербіі. Цяпер жа пратэсты ахапілі ўсю краіну.

Учора ў Белградзе паліцыя ўпершыню ўжыла супраць дэманстрантаў Прыладу далёкага акустычнага дзеяння (LRAD). Яна выпраменьвае накіраваную "гукавую хвалю" сілай да 160 дБ, праз якую ў чалавека з'яўляецца востры боль у вушах, дэзарыентацыя і паніка. Пры працяглым уздзеянні такая зброя нават можа разарваць барабанныя перапонкі і прывесці да незваротных пашкоджанняў слыху.