У Лагойскім раёне затрымалі двух крымінальных аўтарытэтаў

У Лагойскім раёне затрымалі двух крымінальных аўтарытэтаў, інфармуе прэс-служба МУС. Яны займаліся вымагальніцтвам, "выбівалі" грошы ў асноўным у людзей, якія раней мелі праблемы з законам. Нярэдка падставы прыдумляліся. Людзей запалохвалі, пагражалі ім нажом, малатком і сякерай, збівалі іх. Звычайна зламыснікі патрабавалі ад 120 да 500 рублёў.

Адзначаецца, што 48-гадовы крымінальны аўтарытэт дзейнічаў адзін, а часам прыцягваў да вымагальніцтва свайго 38-гадовага "калегу". Раней яны неаднаразова былі асуджаны. Цяпер жа мужчыны арыштаваныя, крымінальную справу распачалі па артыкуле "вымагальніцтва" (ч. 2 арт. 208 КК).

МУС падкрэслівае, што крымінальныя аўтарытэты маюць "цесныя сувязі з прадстаўнікамі крымінальнага свету рэспублікі". Высвятляецца іх дачыненне да іншых аналагічных злачынстваў. Што да "Лагойскай справы", то колькасць пацярпелых можа павялічыцца — людзі сталі звяртацца ў міліцыю толькі пасля таго, як зламыснікі трапілі за краты.