У Беларусі каля мяжы з Украінай адкрылі новую памежную заставу
На адкрыццё прыязджалі госці з Мінска і Гомеля / t.me/gomel_region_gov/
У Беларусі каля мяжы з Украінай адкрылі новую памежную заставу. Яна з'явілася ў Нараўлянскім раёне Гомельскай вобласці і адносіцца да Мазырскага памежнага атрада. Памежная застава "Нароўля" ахоўвае ўчастак мяжы з Украінай працягласцю больш за 60 кіламетраў (раней гэта быў памежны пост, але яго пераўтварылі ў заставу).
Для памежнікаў пабудавалі "сучасны комплекс з неабходным абсталяваннем і тэхнікай", дзе ёсць месцы для захоўвання і рамонту тэхнікі, гадавальнік для службовых сабак. Таксама пабудаваны спецыялізаваны гарадок і спартовыя аб'екты.
На ўрачыстай цырымоніі адкрыцця заставы прысутнічалі старшыня Дзяржпагранкамітэта генерал-маёр Канстанцін Моластаў і намеснік старшыні Гомельскага аблвыканкама Андрэй Бараноўскі.
Летась на мяжы з Украінай адкрылі дзве новыя заставы — "Баравое" ў Лельчыцкім раёне Гомельскай вобласці і "Махро" ў Іванаўскім раёне Брэсцкай вобласці.
