Трамп спадзяецца сустрэцца з Пуціным ужо ў лютым

Дональд Трамп спадзяецца сустрэцца з Уладзімірам Пуціным ужо да канца лютага. Пра гэта прэзідэнт ЗША заявіў, адказваючы на пытанні журналістаў у сваёй рэзідэнцыі ў Фларыдзе. Як вядома, у аўторак у Саудаўскай Аравіі прайшлі перамовы ЗША і РФ, і дамоўленасці пра дакладную дату такой сустрэчы дасягнута не было. Украіна і ЕС на іх не былі запрошаны.

Трамп заявіў, што расчараваны рэакцыяй Кіева на перамовы ў Саудаўскай Аравіі. Паводле яго слоў, Украіна мела тры гады, каб самастойна "заключыць здзелку". Прэзідэнт ЗША абрынуўся з крытыкай на Украіну і яе кіраўніцтва. Ён назваў дзіўны рэйтынг украінскага прэзідэнта Уладзіміра Зяленскага — 4%  (насамрэч у яго каля 50%), заявіў пра неабходнасць выбараў. Амерыканскі прэзідэнт фактычна паўтарыў адзін з асноўных тэзісаў Пуціна, адзначае "Бі-Бі-Сі". Ён таксама раскрытыкаваў былога прэзідэнта Джо Байдэна за яго палітыку ў дачыненні да Украіны.

"Я думаю, у мяне ёсць сіла, каб пакласці канец гэтай вайне, і я думаю, што ўсё ідзе вельмі добра", — сказаў Дональд Трамп. Ён пазітыўна ацаніў перамовы з расіянамі. Ён не пярэчыць супраць адпраўкі еўрапейскіх міратворчых войскаў ва Украіну, калі еўрапейскія лідары прымуць такое рашэнне, паведамляе "Голас Амерыкі".