Сёлета з Польшчы выслалі амаль тысячу беларусаў

Сёлета да канца верасня з Польшчы дэпартавалі 955 грамадзян Беларусі. Такую лічбу назвала Польскае радыё са спасылкай на памежную службу.

Пры гэтым колькасць дэпартаваных сёлета беларусаў зменшылася ў параўнанні з мінулым годам на 11%.

Большасць беларусаў, якіх Польшча пастанавіла выслаць, самі пакінулі краіну. "863 беларусы самі добраахвотна выехалі з Польшчы, а прымусова мы вывезлі на мяжу 92 асобы. Калі параўнаць з мінулымі гадамі, летась такіх рашэнняў было 1075, то бок мы канстатуем змяншэнне на 11%", — паведаміў прадстаўнік Галоўнай камендатуры Конрад Швед.

Асноўнай прычынай дэпартацыі польскія памежнікі называюць нелегальнае перабыванне і нелегальнае працаўладкаванне ў Польшчы.