Сябра КР Уласава: я спытала ў канваіра, куды мы ідзем, ён адказаў — на расстрэл
Сябра прэзідыўму Каардынацыйнай рады Лілія Уласава расказала парталу TUT.by, у якіх умовах яна была пасля затрымання.
67-гадовая юрыстка была арыштаваная за ўдзел у дзейнасці Каардынацыйнай рады. Некалькі тыдняў яна правяла за кратамі. Выпусцілі Уласаву неўзабаве пасля вядомай сустрэчы Аляксандра Лукашэнкі з палітвязнямі ў СІЗА КДБ.
Жанчына кажа, што яе затрымалі супрацоўнікі Дэпартамента фінансавых расследаванняў і спярша пяць гадзін дапытвалі, не пускаючы адваката. Потым завезлі ў Фрунзенскае РУУС Мінска, дзе яна сядзела да ночы.
"Бліжэй да 12-й ночы нас пасадзілі ў аўтазак у вельмі вузкі "стакан". Аўтазак ўсю ноч ездзіў па Мінску, забіралі затрыманых па ўсіх райаддзелах міліцыі. Мы абняліся з суседкай і трымалі адна адну, каб не біцца галавой аб сценку. Я некалькі разоў губляла прытомнасць, не хапала паветра. Прывезлі на Акрэсціна і змясцілі ў "назапашвальнік" — гэта была маленькая брудная камера, дзе стаяла некалькі жалезных ложкаў, прыбіральня-яма і рукамыйніца. Мяне пратрымалі там з 4-й гадзіны ночы да 10-й гадзіны раніцы. Увесь гэты час, з моманту затрымання, гэта значыць амаль суткі, я нічога не ела", — згадвае Уласава.
Па яе словах, дзяжурны міліцыянт на Акрэсціна, прымаючы іх, адзначыў, што гэта першая група, дзе няма збітых.
Запомніла жанчына і "жарт" акрэсцінскага канваіра: "У адну з начэй мяне з сукамерніцамі тры разы будзілі і пераводзілі ў іншыя камеры. Я спытала ў канваіра, куды мы ідзем, ён адказаў: "На расстрэл". На Акрэсціна я была ў шокавым стане і па наіўнасці спадзявалася, што пасля трох сутак затрымання мяне адпусцяць".
Потым Уласаву перавялі ў СІЗА на вуліцу Валадарскага. Яна кажа, што з дзесяці насельніцаў камеры восем палілі, таму было цяжка дыхаць.
Адтуль жа яе вазілі на сустрэчу Лукашэнкі з палітвязнямі. Па словах Уласавай яна спярша не паверыла, што прыйшоў Лукашэнка — думала, што гэта двайнік. Гэтую размову яна адмаўляецца лічыць палітычным дыялогам: "Ну, хіба можа быць раўнацэнны дыялог з людзьмі, якія знаходзяцца ў турме? Мы сядзім брудныя, змучаныя турэмным зместам, агаломшаныя тым, што адбываецца, зусім не гатовыя да сур'ёзнай размовы. Па-мойму, мэта сустрэчы была паказаць, што хоць нейкі дыялог з апазіцыяй пачаты. На заканчэнне сустрэчы Лукашэнка паабяцаў прысутным, што наступны раз сустрэнемся ў Палацы Незалежнасці і працягнем пачатую размову".
Падчас размовы падымалася пытанне жорсткасці з боку сілавікоў. "Лукашэнка перакананы, што сілавікі дзейнічаюць адэкватна, ён верыць у тое, што гэта зваротная рэакцыя на пагрозу з боку пратэстоўцаў. У якасці прыкладаў ён прывёў "напад" Ціханоўскага на міліцыянта і "блакаду" выбарчых участкаў, нібыта людзі "блакавалі" выбаркамы. Яму спрабавалі тлумачыць, што выбаршчыкі прыйшлі даведацца вынікі галасавання, якія не былі апублікаваныя, але ў яго на гэты конт свая версія", — згадвае Уласава.
Юрыстка мяркуе, што па некаторых пытаннях Лукашэнку дэзінфармуюць. "Напрыклад, ён нам паказваў фота маршу 23 жніўня, нібыта сабралася некалькі тысяч чалавек. Але гэта не так, у гэты дзень у Маршы ўдзельнічала больш за сто пяцьдзесят тысяч чалавек", — адзначае яна.
Дарэчы, на пытанне Уласавай, за што яе арыштавалі, калі яна ўсё жыццё займалася перамовамі і медыяцыяй, Лукашэнка адказаў: "Вось і займалася б сваёй медыяцыяй, куды ты палезла?".
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
